"MKATABA WA UDSM, MLIMANI CITY UVUNJWE"- WABUNGE

Wabunge sasa wemeoneshwa kukerwa na Mkataba wa Mradi wa Mlimani City na wameiomba Serikali kuuvunja kwani haukinufaishi Chuo Kikuu cha Dar es Salaam (UDSM) badala yake unamnufaisha mwekezaji Kampuni ya Mlimani Holding Limited (MHL).

Wakichangia Taarifa ya Shughuli za Kamati ya Kudumu ya Bunge ya Hesabu za Serikali (PAC) ya Mwaka 2017 bungeni jana, walisema mkataba huo hauna maslahi kwa ‘UDSM’ hivyo, ni heri uvunjwe.

Mbunge wa Iramba Mashariki, Allan Kiula (CCM) alisema, UDSM hainufaiki na Mkataba huo, kutokana na mwekezaji huyo kuwekeza fedha kidogo kiasi cha Dola za Marekani 75 sawa na Sh 150,000, lakini pia kukimbilia Kituo cha Uwekezaji Tanzania (TIC) ili kupata msamaha wa mwekezaji.

“Mwekezaji amekuwa hayaendelezi maeneo ambayo yangekinufaisha Chuo Kikuu cha Dar es Salaam, badala yake amekuwa akiendeleza maeneo anayonufaika nayo yeye,” alisema Kiula. Alisema, kitu cha ajabu wabia wa mradi huo, wamekuwa wakigawana salio, kitendo kinachoonesha wanapata faida, lakini faida hiyo haiendi UDSM. 

Alisema katika kipindi cha miaka 13 tangu mkataba uingiwe, mradi wa ujenzi wa hoteli ya nyota tatu yenye vyumba 100 bado haujaanza kinyume na makubaliano, hivyo kuongeza gharama za kumalizika mradi.

Mbunge wa Viti Maalumu, Munde Tambwe (CCM), alisema serikali inatakiwa kufuta Mkataba huo japo ni wa miaka 85, kwani ni mbovu unaomnufaisha mwekezaji pekee. Mbunge wa Viti Maalumu, Catherine Ruge (Chadema), alisema mkataba huo una maajabu saba na moja ya majabu hayo ni kwamba, mmiliki wake hajawahi kufika nchini na hivyo anatuma watu kuangalia maendeleo ya mradi huo.

Akiwasilisha taarifa ya Kamati hiyo, Mwenyekiti wa Kamati, Naghenjwa Kaboyoka aliishauri serikali kumwomba Mkaguzi na Mdhibiti wa Fedha za Serikali (CAG) kufanya ukaguzi wa kiuchunguzi katika mchakato mzima wa mkataba huo. 

Koboyoka alisema, kutokana na makubaliano ya ujenzi wa Mradi wa Mlimaji City ulioanza Oktoba 1, 2004, ukitakiwa kukamilika Septemba 01, 2006, kwa makubaliano ya mkodishaji (UDSM) na mkodishwaji (kampuni ya Mlimani Holding Limited) mradi huu bado haujakamilika hadi sasa.

Uchambuzi wa Kamati kupitia taarifa ya CAG pamoja na mahojiano na uongozi wa UDSM, umebaini dosari kubwa katika usimamizi na uendeshaji wa mradi huo, hali unaiyofanya serikali iendelee kupata hasara.

“Upungufu uliopo katika mkataba huo, unainyima Serikali mapato stahiki hivyo kuwa na eneo mojawapo lenye matumizi mabaya ya fedha za umma,” alisema

. Kuhusu Mradi wa Dege, Kigamboni, Kamati imebaini kwamba mradi wa ujenzi wa Dege Eco Village unaotekelezwa na Shirika la Hifadhi ya Jamii (NSSF) umekwama kukamilika kwa wakati, hivyo Bunge linaishauri serikali ikamilishe haraka mradi huo ili kuokoa fedha za umma zinazowekezwa katika mradi huo.

Kuhusu ununuzi wa magari yenye thamani ya Dola za Marakeni 29,606,100 uliofanywa na Jeshi la Polisi bila kuwepo wa mkataba, taarifa ya CAG imebaini dosari kubwa katika mchakato wa ununuzi wa magari 777 uliofanywa na jeshi hilo ikiwa ni pamoja na manunuzi kufanyika bila uwepo wa mkataba.